August 12, 2018

Moenie inmeng nie …

Ek hoor en lees dit maak mens se lewe makliker. Ek luister te veel, sien te veel en hou nie van onreg nie. Dan maak ek my mond oop, al is dit nie MY situasie waaroor ek my mond hoef oop te maak nie.

Dan is daar moeilikheid. En ek weet nie altyd hoe om moeilikheid met ewewig te hanteer nie. Is daar voorskrifte of iets?

Oogklappe. Pluisies vir die ore. Dalk daai oogklappe wat mense altyd vir donkies en perde opsit sodat hulle net voor hulle kan sien. Dit is wat ek nodig het. En oorpluisies dat ek net na my eie stem kan luister.

Advertisements
July 25, 2018

Middel van die week

Die week het vreemd begin. Sommige mense sou sê fashion forward. Ekself sê nee hemel dit pas nie. Dit is al Woensdag en die week sit nog steeds ongemaklik aan my bas.

June 30, 2018

Grondwet en godsdiens

Ons het ‘n baie interressante geval by die werk. Uit ‘n groep van 45 is daar ‘n paar wat nie godsdienstig is nie en gister, tydens ons personeel forum vergadering, het een haar gevoel jeens die open van alle vergaderings met gebed gelug.

Die voorstelling van oplossings was veelvoudig.

1. Die persone wat nie godsdienstig is nie, moet maar later by die vergadering aansluit.

2. Daar moet gestem word en die meerderheid stem is wat gedoen gaan word.

3. Paar minute stilte vervang die gebed.

Weet julle hoe onwrikbaar die meeste christene is? Baie. Onbuigsaam. Hoeveel mense sal hulle lok na hulle godsdiens? Min.

Die grondwet beskerm minderheidsgroepe, mense se keuse van godsdiens en dat godsdiens nie by plekke van werk op mense afgedwing mag word nie.

Volgens my was dit nie juis goed gehanteer nie en buiten dit word die persoon wat dit genoem het, nou geviktimiseer.

June 10, 2018

Babilonstoren

June 10, 2018

Iets van alles

My pa het altyd gesê ek is vol nonsens. Die kinders se pa was van mening dat my wurm weer omgeslaan het. Die 2de eks (twee keer probeer, kan een mens so laf wees?) was nou nie iemand wie mening mens eintlik moet wegstoor nie want alles het eintlik oor hom gegaan dus kan ek net sê dat dit baie tjol was.

Ek gaan baie deur ‘tydperke’, seisoene ter beter verduideliking. Ek is tans midde-in die winter in my winter seisoen. En nee, dit is nie omdat dit winter is nie.

Hier diep binne-in my is ‘n alleenheid wat ek nie kan verduidelik nie. Ek is altyd op soek na iets. En wanneer daar tydens hierdie winter seisoen gebeure is waar ek iets verkeerd ervaar druk dit my in ‘n diepte in wat bodemloos is. Ek raak oorweldig in hierdie alleenheid.

Miskien is dit al die trauma wat ek konstant met my saamdra, wat ek gedink het ek verwerk het maar wat so ‘n letsel op my gelaat het dat ek soms sukkel om asem te haal.

Miskien ja, want ek weet verseker dat ek nie selfsugtig is nie. Ek weet verseker dat ek nie eiewys is nie. Ek weet verseker dat ek nie dom is nie.

May 12, 2018

Rustig

Ek is mos van Januarie af sonder DSTV. My keuse gewees. Ek kyk nou die minimum TV ooit. Dink nog daaraan om DVD’s te gaan uitneem maar tans geniet ek dit om meer te lees en musiek te luister.

Mica kom haal my sommer al vroeg saans. Soms hier by half 7, sodat ons kan bed toe gaan. Nie dat ek altyd vroeg slaap nie. Ek lees gewoonlik tot laat.

Ek mis TV regtig nie. Dit was een van my tydmors aksies. Elke aand voor die TV.

April 29, 2018

Jouself

So sit ek die Sondagmiddag met my 1ste glas wyn, ons tel elke klein bietjie tot dit 1 glas sou maak, en ek onthou wie ek is. Mededeelsaam. Soos ‘n sagte toffie. Taai buite met ‘n sagte binnekant. Wat niemand volgens my raaksien nie.

Ek bekyk my plek en ek hou van my meubels. Ek hou van my boeke. Ek hou van my glase waarin my wyn is. Ek het eens op ‘n tyd my liefde 100% gegee en ek weet ek kan dit doen.

Ek drink die glas wyn op my.

April 21, 2018

Kouseltjie

April 14, 2018

56 en nog ‘n bietjie

En so is dit nog ‘n jaar by. Ek het die mooiste blomme gekry. En van my baas en sy vrou ‘n notaboek (vir al my geskribbels), koekies en ‘n geskenkbewys van Placecol. En ek weet klaar wat ek gaan doen. Die parafien vir my voete.

Buiten dit het my seun ‘n video gestuur so ek kon sy gesig sien. Ma se hart.

Vandag is dit Royal Tea by The Silo met Sus en Em. My boet-hulle het geldjie in my rekening gesit so ek kan myself verder bederf met of Nataniël op 30 April of The road to Mecca. Lekker!

Ouer word is deel van die lewe. Ons breine mag dalk soms terugbeweeg na die jonger dae toe, maar ons liggame verskrompel.

O ja en ek kan 2 groottes kleiner klere aantrek 😀😀😀😀😀.

April 7, 2018

Wat wil jy die res van jou lewe doen …

Gister was dit weer spanbou. Nie dat ons WOU gaan nie, meeste van die personeel wou jaarafsluiting doen. Maar ons het mor-mor gegaan. Gewoonlik is daar iets fisies wat gedoen moet word. Oefeninge, spansport ens. Gister was ons by Hillcrest Quarry. Heerlike area en uitstekend vir sulke tipe goed (ek probeer nou die afrikaans vir event kry maar dit ontglip my heeltemal).

Ewenwel. Die oggend was opgeneem deur eerstens ‘n lewensafrigter wat nogal ‘n waar paar punte aangeraak het.

Wie is ek?

Waarheen wil ek gaan?

Terwyl ek by die werk is, is dit waar ek wil wees?

Doen ek wat ek wil doen?

Wat is my toekomsplanne? Want jy kan ander toekomsplanne hê, maak nie saak wat jou ouderdom is nie.

Wat gaan ek daaraan doen?

Wat is my PASSIE?

Daar was, soos gewoonlik, mense wat nie daarvan gehou het nie. Wat geensins enige impak gevoel het nie. Net stukkies daarvan geneem het maar oor die algemeen dit te eenvoudig en 100% ‘boring’ gevind het.

Dit het my egter in ‘n ander rat gesit.

Toe kom die span aktiwiteit. Die keer was dit verf. En ek het dit geniet. 100000000% meer as enigiets anders. Kunsklasse. Dit is wat ek die jaar gaan doen.

My passie is woorde. Woorde en skets. En ek wil iets daarmee doen. Vir myself.

Die eindproduk van 7 spanne en 14 stukke.